Intanet ta sa Africa da Indiya samun ci gaba

Samar da hanyoyin shiga intanet masu sauri a wayoyin salula a Afrika da Indiya za su kauce wa hanyoyin da aka saba bi wajen bunkasa tattalin arziki. Hanyoyin shiga intanet masu sauri a wayoyin salula sun sa Afrika da Indiya samun ci gaba cikin hanzari. Gwamnatoci a wadannan kasashe sun hakikance cewa amfani da hanyar sadarwa ta intanet na 4G ya fi bunkasa harkokin kasuwanci fiye da hanyoyin sadarwa da aka fi sani a da. Wani dan Najeriya mai yada labarai ta intanet, Yomi Adegboye, ya ce ci gaban fasahar zamani ya kawo bunkasar kasuwanci sosai. Mista Adegboye ya kara da cewa, "A yanzu ina iya yin abubuwa da dama da intanet cikin kankanen lokaci ba kamar a baya ba. Samun hanyar sadarwa ta intanet mai sauri na nufin mun yi nisa a ci gaba na zamani." Ya ce ana iya sauko da abubuwa daga intanet cikin sauki, kuma hakan yana kara wa abokan cinikinsu kwarin gwiwa. Mista Adegboye na daya daga cikin mutane na farko da suka fara cin moriyar hanyar sadarwa ta intanet na 4G a Najeriya da Afrika. "Bambanci karara" Amma ko mene ne dalilin da ya sa za a tafi kai tsaye zuwa hanyoyin intanet ta 4G a nahiyar da wurare da dama ba su da hanyoyin intanet na 3G ko 2G? Shugabar kamfanin sadarwa na Smile Group, Irene Charnley, ta ce dalilin hakan shi ne saboda amfani da 4G ya fi sauri da kuma samar da biyan bukata. "Samuwar Intanet a Indiya" A Indiya kuwa, Firai minista Narendra Modi yana bai wa harkokin intanet muhimmanci karkashin wani shiri da ya bullo da shi mai taken "Digital India," da zummar cewa hakan zai taimaka wajen zamanantar da harkokin kowanne bangare na kasar, kama daga harkar ilimi da lafiya da samar da abinci da kuma kere-kere. Masu amfani da wayar salula kimanin miliyan 950 a kasar sun fi amfani da wayoyin salularsu ne don yin kira, saboda har yanzu hanyar sadarwa ta intanet bata da sauri a kasar. Shugaban wani kamfanin sadarwa na Culture Machine, Sameer Pitalwalla, ya ce yana kokarin ganin ya gano hanyar da za a yi domin intanet ya dinga sauri yadda ake so. Amma a yayin da biranen Indiya da na Afrika ke cin moriyar amfani da hanyar intanet na 4G, al'ummar kauyukansu na ganin kamar an bar su a baya saboda masu samar da hanyoyin inatent sun fi mai da hankali ga bunkasa birane.

An gano matsalar kulle waya a manhajar Android

Masu bincike a jami'ar Texas sun gano wata matsala a manhajar Android da ka iya ba mutane damar bude wayar da aka kulle. Masu binciken su gano cewa ta hanyar amfani da kalmar sirri mai matsawo a matsayin mabudin wayar hannu ko tablet ka iya sa tsarin da ta ke aiki da shi ya wargaje a cikin wasu yanayi. A wannan matsalar ta fi faruwa ne a nau'in lollipop na manhajar Android na baya-bayan nan wanda ke amfani da shi a wayar hannu. Kamfanin Google ya foto da maganin wannan matsala ga samfurin Nexus a ranar Laraba. Kusan kashi 21 na wayoyi masu amfani da manhajar Android na aiki ne da wadanda suke da matsalar. Bayan ruguje tsaron, masu binciken sun samu damar bude bayanan da ke cikin wayar da kuma sauran abubuwan da ke ciki. Sai dai a cewar masu binciken za'a iya maganin matsalar idan mai na'urar ya yi amfani da zane ko lambar sirri a maimakon kalmar sirri a yayin kullewa.

Apple ya yi jinkiri wajen sabunta manhajar agogonsa kirar WatchOS 2

Kamfanin Apple ya yi jinkiri wajen sabunta tsarin da agogon sa kirar WatchOS 2 ke aiki dashi, bayan ya gano wasu kura-kurai a cikin manhajar Agogon. Apple ya yi niyyar sabunta manhajar Agogon na sa ne tare da wayar sa ta komai da ruwanka kirar iOS 9 . A cewar wani kamfanin bincike mai suna IDC, Agogon kamfanin Apple ya kasance wanda yafi kasuwa da ake rububinsa a yanzu. Sai dai kuma manhajar da ke cikin Agogon kamfanin a yanzu ba ta bayar da dama ga wata manhaja ta daban tayi aiki a cikin agogon ba. Wani wakilin kamfanin ya shaidawa manema labarai cewa sun gano wasu kura-kurai a Agogon na su na Watch0S 2, a saboda haka za su dauki dan lokaci kafin gyara kura-kuran. Wakilin kamfanin ya cigaba da cewa ba zasu samu damar fito da sabon agogon na su kirar WatchOS 2 ba a yan kwanakin nan, amma nan bada jimawa ba za a fito dashi. A watan satumbar bara, kamfanin Apple ya nemi gafara masu hulda dashi bayan sabunta wayar su ta salula kirar iOS ya haifar da matsala ga wasu wayoyin su a inda ba a iya kiran waya da su. A ranar laraba, kamfanin Google ya hanzarta magance matsalar wayar sa kirar Android OS bayan ya gano cewa za a iya bude wayar ta hanyar rubuta dogayen kalmomin sirri.